Gedichte von Georg Fox

 
 
 

Mundarttexte in der Regionalsprache Rheinfränkischer Dialekt von
Georg Fox, Oktober 2010

Hinweis :  Am Ende dieser Seite finden Sie unseren Player der Ihnen die Texte von Georg Fox gesprochen abspielt.

Alte-Kokerei-VK-Htte_IKA
                                                                                                                 Alte Kokerei, Vöklinger Hütte  Aquarell von Georg Fox

 

 

,,Uff" der Aarwed

"Uff" der Aarwed
bin isch
allseiläwe
gewään.

 

Awwer die Aarwed
war all die Jòhre
iwwer mier,
nääwe mier,
vòòr mier
unn hinner mier.

 

"Uff" der Aarwed
bin isch
all die Jòhre
nie gewään.
Isch bin
jeeder Daach
nuur
middedrin
geschdann!

 

 

 

 

Geschaffd – gelääbd

 

Sei Lääbdaach

hadder geschaffd,

awwer sei Lääwe dse lääwe

hadder allseilääwe

nidd geschaffd!

 

 

E Gruuwelamb

 

Häddsche kää Gruuwelamb?

Känndschde mer kään besorsche?

Isch breischd ään

dsem Verschengge!

E Gruuwelamb?

Die verschenggd mer nidd,

weil dòò immer noch

e bissje Angschd

draan

babbd!

 

 

Schischd uff der Hidd

 

Die Naachd dsem Daach,

de Daach dser Naachd.

Gebloddsde Iwwerschdunne

unn Dobbeschischde.

Feierheiss im Gwalm geschaffd.

Schdaab gefress

unn Gaas geschluggd.

Dswischedrin mòòl

Lufd geschnabbd.

Eewisch unn drei Daach

geraggerd uff der Hidd

bis dsem Umfalle!

Gans vòòre geschdann,

dirregd debei,

Fungge abgridd

uff die naggisch Haud.

Brandblòòse alsemò

unn immer widder.

Ball vernaarbd,

awwer wegg waare se

niemeh!

 

Die Aarwed geschaffd,

wo annere gefeierd hann,

wo annere gesuff hann,

wo annere gelääbd hann,

wo annere geschlòòf hann.

Jeeder Daach, jeed Naachd,

ääns wies anner,

awwer nie isses gewään

wie bei normaale Leit.

 

 

Aan der Hidd

 

Die Schloode blòòse nimmeh

unn wann Schischdweggsel iss

kumme nuurmeh

e paar Leit ausem Door.

„Die Hidd iss inngemodd dòòjaus!“,

saan die Leit,

„dòò gebbds kää Aarwed meh!“

Frieher hadds dòò

gerummsd unn gedrehnd,

unn es hadd

nòò Gaas geroch.

Jeddse iss

alles schdill

bis uff die paar Leit,

die ausem Door kumme,

wann Schischdweggsel iss.

 

 

Gruuweschääde

 

E Riss in der Wand

unn e Dier,

die de nimmeh

dsuumache kannschd.

Dòò wääschde danne genau,

dassde Gruuweschääde haschd.

Jeddse lernschde die Schbrisch

vum Berschschaadensamd

kenne.

Die schwäddse

vum Minderweerd

unn vum Ausgleisch

uff alle Gebiede.

Vum Verbresse

unn vum Deggeindsiehe,

wanns nidd annerschd

gehn gääd.

Danne fangschde aan

uff die Gruub dse schille

unn geesche se

se weddere:

Owwe baue se

Berschmannsheisjer

unn unne

sorsche se defier,

dasse owwe waggele!

Unn danne saaschde:

Besser mer wääs,

wos häärkummd.

Unn de hollschd

dei Baggaasch

unn dsiehschd um

inne annerer Ord.

Awwer dei Gedangge

kannschde nidd midd

umdsiehe lasse.

 

Irschendwie

bleiwe die

serigg.

 

 
 

Mit freundlicher Genehmigung des Autors
entnommen dem Hörbuch:
Ganz äänfach: Gudd druff (CMO-music)

Copyright Georg Fox © 2010

______________________________________________________________________________________________
Mehr über den Autor Georg Fox finden Sie hier:  Bitte klicken

Vorlesen lassen!
Klicken Sie bitte auf den weiße Dreieck und hören Sie
die Texte von Georg Fox gesprochen.